महाराष्ट्र अंधश्रध्दा निर्मूलन समिती रायगड जिल्ह्याच्या वतीने माणगाव मध्ये अंधश्रध्दा निर्मूलन कला प्रदर्शन

माणगाव:  महाराष्ट्र अंधश्रध्दा निर्मूलन समिती रायगड जिल्ह्याच्या वतीने अशोक दादा साबळे विद्यालय, कचेरी रोड, माणगाव येथे दोन दिवसीय अंधश्रध्दा निर्मूलन कला प्रदर्शन आयोजित करण्यात आले आहे. या प्रदर्शनाच्या उद्घाटन प्रसंगी उपविभागीय पोलीस अधिकारी माणगाव नितीनकुमार पोंदकुळे, माणगाव तालुका तहसीलदार संजय गारुडकर, माणगाव पोलीस निरीक्षक राजेंद्र पाटील, माणगाव शिक्षण प्रसारक मंडळाचे अध्यक्ष राजू साबळे, माणगाव नगरपंचायत नगराध्यक्ष ज्ञानदेव पवार, माणगाव नगरपंचायत मुख्याधिकारी संतोष कोळी, माणगाव तालुका प्रेस क्लब चे गौतम जाधव उपस्थित राहणार आहेत. या कला प्रदर्शनात महा. अंनिसची पंचसूत्री, संविधानिक मूल्ये, अंधश्रध्देच्या विविध घटना यातून मांडल्या जात आहेत. अंधश्रद्धा निर्मूलनाचा, विचारांचा वारसा व अंधश्रद्धा निर्मूलन समितीच्या कामाची व्यापकता दाखविणारे हे प्रदर्शन असणार आहे.  २९ व ३० डिसेंबरला आयोजित या प्रदर्शनास माणगाव मधील नागरिकांनी भेट द्यावी असे समितीतर्फे आवाहन करण्यात आले आहे.